Во Општина Кавадарци се одржа регионалниот форум за одржлив третман на биоотпадот, дел од проектот „Нула биоотпад: системски промени во партнерство со граѓаните“ поддржан од Владата на Швајцарија преку Цивика Мобилитас што го спроведува Зелен институт во партнерство со Националното здружение на сопственици на приватни шуми.
Модераторката Ана Петровска посочи дека пренасочувањето на биоотпадот од депониите значи не само премин кон „нула отпад“ општини, туку и почист воздух и подземни води и помал ризик од пожари. Поздравно обраќање имаше Зорица Стрезоска од Министерството за животна средина и просторно планирање.
Експертите Наталија Бургиева и Аријан Тоска нагласија дека биоотпадот е ресурс со вредност и го претставија Базичното истражување за управување со биоотпад во Вардарскиот плански регион. Карактеристично е винарството со комињето, кое се селектира и во голема мера го презема биоцентралата во Градско. Останатиот биоотпад доаѓа од угостителството и туризмот, индустријата, шумарството и дрвната индустрија, институциите, трговијата со храна и земјоделството. Биоотпадот сега само делумно се обработува во двете биогасни централи во Сарамзалино и Градско (од винарии и фарми).
Беа понудени три сценарија за третман на биоотпадот: Реално сценарио со постоечки централи, ново општинско компостирање и развој на биоиновации (најевтино и најбрзо за 1-2 години); идно сценарио со нова биогасна постројка кај пречистителната станица во Велес (најскапо, со подолг период за реализација); фазен премин од прво на второ сценарио со компост веднаш, а биогас подоцна. Беше предложен и Регионален хаб за циркуларна економија, по примерот на многу земји, каде се стимулираат иновативни пристапи за третман на биоотпадот.
Во дискусијата беа разменети искуства, мислења и предлози за унапредување на системот за управување со биоотпад. Општина Кавадарци е подготвена за пилот-проект за одвоено собирање и за обезбедување простор за компостирање; веќе трета сезона по ред поставува контејнери за собирање комиње од домаќинствата.
Претставниците од биогасната централа од Градско изразија поддршка за идни активности и иницијативи во насока на подобар третман на биоотпадот, со предлог да се зајакне законската регулатива. АД Тиквеш ги претстави своите позитивни практики и поддржа воспоставување Регионален хаб за циркуларна економија, со подготвеност да биде негов домаќин. Поддршка изрази и директорот на Центарот за развој на Вардарскиот плански регион, потенцирајќи ги регионалниот пристап и меѓуинституционалната соработка. Граѓанската организација Ековита сподели искуство за третман на биоотпад на иновативен начин (со ларви од црна војничка мува) и соработка со локалното комунално претпријатие за зелениот пазарен отпад.
Присутните граѓани, претставници на бизнис секторот и институциите ја поздравија иницијативата за унапредување на третманот на биоотпадот, заснован на принципите на циркуларната економија, регионалната соработка и активното учество на локалните заедници, институциите и приватниот сектор, со спремност да се вклучат во идните процеси на селектирање, собирање и третман.
На форумот учествуваа директорот на Центарот за развој на регионот, директори на јавните комунални претпријатија од Кавадарци, Демир Капија, Росоман и Свети Николе, претставници на ЈП Национални шуми и Државниот инспекторат за животна средина, како и претставници на индустријата, земјоделството, приватните шуми, заинтересирани граѓани и медиумите.